வருத்தப்படாத வாலிபர் சங்கம் - விமர்சனம்

வருத்தப்படாத வாலிபர் சங்கம் - விமர்சனம்

டைமிங் காமெடி, கலர்ஃபுல் காட்சிகள், அசரவைக்கும் பாடல்கள் என கலகலப்பான படம். வாரம் ஒருமுறை வரிசைகட்டி வரும் காமெடிப் படங்களில் இதுவும் ஒன்று, ஆனால் சத்யராஜும் சிவகார்த்திகேயனும் இதில் ஸ்பெஷல்! கதை ஒன்னும் புதியதாக இல்லை என்றாலும் திரைக்கதையும் காட்சியமைப்பும் கலகலப்பாகவே அமைந்திருக்கிறது. 

ஓப்பன் பண்ணா ஒரு அழகான கிராமம் - அங்க ஒரு அம்சமான பொண்ணு - அந்தப் பெண்ணை அடிக்கடி வம்புக்கு இழுக்கும் ஒரு சுமாரான வாலிபன் - கட் பண்ணா, வில்லனாக துப்பாக்கியோடு வரும் அந்த பெண்ணின் அப்பா - ஊரைவிட்டு காதலர்கள் ஓடிப்போறாங்க - க்ளைமாக்ஸ்! இதை அப்படியே டெவலப் பண்ணா அதுதான் வருத்தப்படாத வாலிபர் சங்கத்தின் கதை. இது ஒரு கதையான்னு நினை வேண்டாம், இந்தப் படத்துலயும் கடைசியா ஒரு புது விஷயம் இருக்குல்ல... 

காலரைத் தூக்கிவிட்டு கலர்கலர் சட்டைப் போட்டு அழகான பெண்களுக்கு ஐ லவ் யூ சொல்லும், எம்.ஏ. எம்.ஃபில் படிச்ச பட்டதாரி போஸ்பாண்டி(சிவகார்த்திகேயன்). வருத்தப்படாத வாலிபர் சங்கத்தின் தலைவர் இவர் தான். ஊருக்கு நடுவில் ஒரு ஆலமரம், அதன் நிழலில் படுத்து தூங்குவது தான் சங்கத் தலைவரின் அன்றாட வேலை.

அந்த ஊர் ஸ்கூல் டீச்சராக கல்யாணி (பிந்து மாதவி). அவரை கரெக்ட் பண்ணி கல்யாணம் பண்ண வேண்டும் என்பதுதான் போஸ்பாண்டியின் ஆசை. அதற்காக அந்த ஸ்கூல் பள்ளி மாணவியான லதாபாண்டியிடம்(அறிமுக நாயகி ஸ்ரீதிவ்யா) லவ் லெட்டர் கொடுத்து விடுகிறார். இவருக்கு இன்னொரு வேலையும் உண்டு. ஊருக்குள் இல்லீகலாக எது நடந்தாலும் அதை அரசாங்கத்திற்கு தெரியபடுத்தி பலபேரை டெரர் ஆக்குவது! 

தன் தாத்தா காலத்து மிலிட்டரி துப்பாக்கியை தன் புல்லட் வண்டியில் மாட்டிவிட்டு, கம்பீரமாக வலம் வருபவர் சிவனாண்டி. ஊரில் செல்வாக்கு நிறைந்த சிவனாண்டி தன் மகள் லதாபாண்டிக்கு அவசர அவசரமாக திருமண ஏற்பாடுகள் செய்கிறார். மேஜராகாத ஒரு பெண்ணுக்கு திருமணம் நடக்கிறது அதை தடுத்து நிறுத்துங்கள் என நீதி கேட்டு காவல் துறைக்குப் போகிறார் போஸ்பாண்டி. காவல் துறையும் தன் கடமையை செய்கிறது. 

தனக்குப் பிடிக்காத தன் கல்யாணத்தை நிறுத்தியது போஸ்பாண்டிதான் என நாயகி லதாபாண்டிக்கு தெரியவர, காதல் மலர்கிறது. போஸ்பாண்டி கல்யாணி டீச்சருக்கு கொடுத்தனுப்பும் லவ் லெட்டர்களை தனக்கானதாக மாற்றி காதல் மழையில் நனைகிறார் லதாபாண்டி. ஒரு நாள் அந்த துயர செய்தி போஸ்பாண்டியை வந்துசேர்கிறது. கல்யாணி டீச்சருக்கு கல்யாணம் என்பது தான் அது! 

வழக்கமாக லதாபாண்டியை பள்ளி சீருடையில் பார்த்த போஸ்பாண்டி, ஊர்த்திருவிழாவில் சேலைகட்டி வரும் லதாபாண்டியைப் பார்த்து அசந்துபோகிறார். கல்யாணி டீச்சருக்கு கொடுத்தனுப்பிய ஊதா கலரு ரிப்பன் லதாபாண்டியின் ஜடையில் இருப்பதையும் கவனிக்கிறார். பிறகு என்ன ஒருபுறம் இவர்களுக்குள் கண்ணா பிண்ணா என காதல் வளர... மறுபுறம் தன் மகள் கல்யாணத்தை நிறுத்தியது யார்? என்று தீவிர விசாரணையில் இருந்து வருகிறார் சிவனாண்டி. அது மட்டும் இல்லை வீடு புகுந்து தான் உயிராக நினைக்கும் துப்பாக்கியை திருடியவனையும் தேடிவருகிறார். ஆனால் இரண்டுமே போஸ்பாண்டி தான் என்பது அவர் மகள் லதாபாண்டிக்கு மட்டும் தான் தெரியும்.

சிவனாண்டி ஊரில் இல்லாத நேரத்தில் அவர் வீட்டு பசுமாடு தவரி கிணற்றில் விழுந்து உயிருக்கு போராடி வருகிறது. சங்கத் தலைவருக்குத்தான் பொதுநலம் அதிகமாச்சே... உடனே ஃபயர் சர்வீசுக்கு போன்போட்டு வரச்சொல்லி, அவர்கள் வரும்வரை கிணற்றில் குதித்து மிரண்டு கிடக்கும் பசுமாட்டை பாதுகாத்து வருகிறார் போஸ்பாண்டி. இந்தக் காட்சியில் தான் லதாபாண்டியின் இதயத்தில் பட்டும் இல்லை, அவரின் அம்மாவின் மனதுக்குப் பிடித்தவராகவும் மாறிவிடுகிறார்.

ஒருநாள் லதாபாண்டியின் வீட்டுக்கு சென்று அவரோடு ரொமாஸ் செய்வதில் பிசியாக இருக்க்கும் போஸ்பாண்டி, லதாபாண்டியின் அப்பா சிவனாண்டியிடம் போஸ்பாண்டி வசமாக சிக்கிக்கொள்ள, லதாபாண்டிக்கு அவசர அவசரமாக கல்யாண ஏற்பாடுகள் நடக்கிறது. ஊரைவிட்டு ஓட ஹீரோவும் ஹீரோயினும் பிளான் போடுகிறார்கள், ஓடிப்போன இருவரும் சிவனாண்டியால் வெட்டிக் கொலை செய்யப்பட்டார்கள் என ஊரெல்லாம் செய்தி பரவுகிறது...  ஆனால் உண்மை அது இல்லை... என்ன நடந்தது என்பது க்ளைமாக்சில்!

ஆளும் சரி, நடிப்பும் சரி, வருத்தப்படாத வாலிபர் சங்கத்துக்கு தகுதியாக தலைவராக போஸ்பாண்டி என்கிற சிவகார்த்திகேயன். ஆட்டம் பாட்டம் என ஆள் அசத்திவிட்டார். அவருக்கு செயலாளராக கோடி என்கிற சூரி. சங்கத்துக்கு நீ தலைவரா இருப்ப... உனக்கு பின்னால உன் பையன்... அப்புறம் உன் பேரன்... நாங்கள்ளாம் பரம்பரை பரம்பரயா செயலாளராகவே இருக்கனுமா? என்று புரட்சி(!) வசனம் பேசி ‘எப்போதும் வருத்தப்படாத வாலிபர் சங்கம்’ என புதிய சங்கத்தை தொடங்கும் சூரி காட்சிக்கு காட்சி காமெடி பட்டாசுகளை அள்ளிவிடுக்கிறார். புதுமுகம் ஸ்ரீதிவ்யா, பார்க்க பளிச்சுன்னு இருக்கு - நடிப்பு நச்சுன்னு இருக்கு! 

சத்யராஜ் - ஒரு சீனியர் நடிகருக்கான திறமையை 100% நிரூபித்திருக்கிறார். க்ளைமாக்ஸ் வரை தன்னை சீரியசாக  காட்டிக்கொள்ளும் சத்யராஜ், கடைசியில் கலகலப்பாக மாறி தன் உண்மையான கேரக்டரில் கலக்குவது அசத்தல்! சத்யராஜ் சிவகாத்திகேயனை மாப்ள என்று சொல்வதும், சிவகார்த்திகேயன் சத்யராஜை  மாமா என்று சொல்வதும் பலே காம்பினேஷன்! என் மூணாவது பொண்ணு ஓடிப்போய் கல்யாணம் பண்ணிகிட்டா நானே என் காதை அறுத்துக்குறேன் என்று சொல்லும் சத்யராஜ், க்ளைமாக்சில் தன் காதை தானே அறுத்துக்கொள்வது சுவாரஸ்யம்!  

டி.இமான் - படத்தின் எல்லா பாடல்களும் லட்டு மாதிரி இருக்கு. பாட்டு வரும் நேரம் வெளியே போகும் ஆசாமிகள் கூட பாட்டுக்காக உள்ளே வரும் அளவிற்கு இசை வேட்டையாடுகிறார். ’ஊதா கலரு ரிப்பன்... உனக்கு யாரு அப்பன்... - இந்த பொண்ணுங்களே இப்படித்தான் புரிஞ்சுபோச்சுடா! அவங்க கண்ணு நம்ம கல்லறன்னு தெரிஞ்சுபோச்சுடா’ என்று வாலிபர்களுக்கு ஏற்ற தத்துவங்களை பாடல்வரிகளில் தாராளமாய் தந்திருக்கிறார் யுகபாரதி. 

துப்பாக்கியை காணவில்லை என்று தேடிக்கொண்டிருக்கும் சத்யராஜ், தன் மகளிடன் துப்பாக்கி பாத்தியாமா என்று கேட்டதும், ’பாத்தேன்பா... விஜய் நடிச்ச படம் தானே’ என்று கலகலப்பான வசனங்களுக்கு படத்தில் பஞ்சம் இல்லை. வசனம் இயக்குனர் எம்.ராஜேஷாச்சே..! இயக்குனர் பொன்ராம், முதல் படத்திலேயே பொன்னாக மின்னுகிறார். அடுத்தடுத்து படங்களிலும் தக்கவைத்துக் கொள்ள வாழ்த்துகள்! 

இந்தப் படத்தில் ஏண்டா நடித்தோம் என்று சிவகார்த்திகேயனோ, சத்யராஜோ வருத்தப்படமாட்டார்கள். இந்த படத்துக்காக பணம் போட்டோமே என்று தயாரிப்பாளரும் வருத்தப்படமாட்டார். மிக முக்கியமாக இந்த படத்தை ஏண்டா பார்க்க வந்தோம் என்று ரசிகர்களும் வருத்தப்பட மாட்டார்கள்.

வருத்தப்படாத வாலிபர் சங்கம் - அசத்தும் காமெடி - அமோக வெற்றி! 
thanks for nakkeran